Nakrir leikarar á føroysku ungdóms- og A-landsliðum hava um vikuskiftið verið í Íslandi og luttikið í kappingini BH Open, sum er ein árliga afturvendandi kapping í Hafnarfirði, har føroyingar javnan hava luttikið áður. Talan er um eina stinna kapping fyri bæði ungdóm og vaksin, og bæði í støði og sosialt passar hon væl til føroyingar.

Fyrsta føroyska heiðursmerkið kom í hús tíðliga leygardagin. Hesum stóð Rasmus Teitsson í Skorini fyri. Hann vann U15A-kappingina, og tað var eisini um reppið, at hann vann U19A-kappingina. Her kom hann í finaluna, men tapti tepurt 3-2 í finaluni ímóti William Si Chang úr svenska felagnum, Lund.

Eitt annað gullheiðursmerki kom eisini í hús hendan leygardagin. Tað var Suni á Lava, sum vann hetta í U19B-kappingini. Suni spældi sum heild væl og gjørdi eisini um seg í U15A-kappingini, har hann spældi seg heilt í hálvfinaluna og harvið vann bronsu.

Hetta vóru tó ikki seinastu heiðursmerkini hjá teimum báðum Tór-vinmonnunum, Rasmusi og Suna, tí sunnudagin vóru teir í parti í liðkappingini, og her megnaðu teir at vinna bronsu í C-kappingini.

Sunnudagin vóru eisini føroysk heiðursmerki. Eitt teirra vann A-landsliðsleikarin, Albert Weihe Wolfsberg, sum var komin til Íslands úr Hillerød, har hann býr og spælir borðtennis. Hetta heiðursmerki var í grundini í einari aðrari kapping, nevniliga stóru ítróttakappingini Reykjavík International Games, sum um sama mundið - einans eitt gott korter úr hinari høllini - varð spæld og fyriskipað soleiðis, at leikarar kundu luttaka í báðum kappingunum.

Albert gjørdi bart og vann bronsu í Reykjavík International Games. Nevnast kann, at hann í fjórðingsfinaluni vann frálíkan 4-3-sigur á tí annars stinna íslendska landsliðsleikaranum, Magnúsi Jóhann Hjartarsyni. Í hálvfinaluni gjørdist hann ov stuttur og tapti 4-0 ímóti pólska Maksymilian Alot, sum seinni vann kappingina.

Í liðkappingini sunnudagin spældi Albert saman við Ára Fríðasyni Jensen. Teir báðir gjørdust nummar trý í bólkaspælinum í A-bólkinum, og spældu síðani plaseringsdyst. Hendan dystin vunnu teir eftir eitt stórt comeback, tá Ári í fimta og avgerandi dystinum var aftanfyri 0-2 í settum, men ongantíð misti mótið og fekk kúgvent gongdini til ein søtan og harðvunnan 3-2-sigur - og harvið samstundis eisini ein 3-2-sigur í samlaða liðdystinum.

Tær báðar føroysku kvinnurnar í kappingini, Elsa Kathrina Gisladóttir og Hadassa Schwartson Christiansen, komu eiheldur tómhentar aftur til Føroya. Tær vunnu nevniliga bronsu í D-bólkinum í liðkappingini, har tær í bronsudystunum vóru í einum sonnum gysara ímóti Hrefnu Namfa Finnsdóttir og Onnu Marczak.

Her var neyðugt við einum fimta og avgerandi dysti, áðrenn ein góður samlaður 3-2-sigur kom í hús. Elsa Kathrina og Hadassa vunnu tvímansleikin 11-9 í avgerandi setti, og í einmansleikunum var Elsa Kathrina, sum nú spælir við antispin í eina belegninginum, ikki til at syfta. Hon vann báðar sínar dystir.

Jósva Fonsdal Højgaard og Poul Knút Poulsen spældu saman í liðkappingini, og teir vóru við í C-kappingini, har mótstøðan var rættiliga stinn, men gott var hjá teimum báðum at fáa ein sigur í síðsta dystinum, sum var ein plaseringsdystur fyri 3’arar. Hendan dystin vunnu teir ímóti Magnúsi Thor Holloway og Péturi Xiaofeng Árnasyni.

Føroyska ferðalagið, sum eisini taldi føroyska landsliðsvenjaran, Simon Nykjær-Fisher, og liðleiðaran, Gisla Sveinbjørnsson við soninum Sveinbjørn, kom aftur í Vágar seinnapartin, og semja var um, at hetta aftur í ár var ein frálíka væl eydnað kapping, sum miðað verður ímóti at luttaka í aftur næsta ár.

Myndir: Ingimar Ingimarsson / Borðtennisdeild BH