Føroyski landsliðsleikarin, Henrietta Nørr (fyrr Nielsen), var síðsta vikuskifti við til at tryggja liði sínum, Viby BTK, tríggjar frálíkar sigrar í bestu donsku deildini, Elitedivisionen. Sigrarnir vóru ímóti Roskilde, Sorø og Hvidovre.

Í fyrsta liðdystinum ímóti Roskilde legði Henrietta væl frá landi og vann 3-1 á Katrinu Møller, og hóast hon tapti seinna dystin tepurt 3-2 fyri Miu Dong, so var samlaði sigurin hjá Viby BTK ongantíð í vanda, og endin var, at tær vunnu liðdystin 6-2.

Annar dysturin leygardagin varð vunnin trygt 6-0 á Sorø, sum einans stillaði upp við tveimum spælarum, og harvið tapti nakrar av dystunum uttan dyst. Henrietta vann báðar sínar dystir greitt.

Sunnudagin var týdningarmikil dystur á skránni ímóti Hvidovre. Við einum sigri kundi Viby BTK tryggjað sær eitt pláss í endaspælinum, og Henrietta legði frálíka væl fyri við at vinna 3-2 á Saru Palm, ið annars var ósigrað hetta kappingarárið.

Ein troytt Henrietta tapti sín seinna dyst, men tað hevði lítið at siga, tí tað endaði við, at Viby BTK vann liðdystin 6-3 á Hvidovre og hevur tryggjað harvið sær pláss í endaspælinum. Viby BTK er nummar tvey í Elitedivisionen og hevur einans ein dyst eftir at spæla, sum verður ímóti Ballerup tann 31. mars.

Henrietta hevur í eina tíð stríðst við skaða í hælunum. Hon sigur seg fegnast um, at hon megnaði at hanga í allar tríggjar liðdystirnar síðsta vikuskifti, og hóast hon kennir á sær, at konditiónin ikki er upp á tað besta, so gongur tað rætta vegin.

Støðan í Elitedivisionen